自由黨張宇人啱啱喺紐約出席完囡囡嘅婚禮，噚日喺立會仍然表現興奮，話第一次出席教堂以外嘅婚禮，又話囡囡搵咗個黑人女牧師做證婚人，都咪話唔特別，不過八方問佢攞相睇，佢就死都話冇，因為答應咗個女同女婿保持低調。
問到佢同太太榮升外父外母感覺如何，有冇感觸流淚？肥仔張話冇乜，因為外嫁女都重係自己囡囡。但佢話太太就慘啲，事關佢呢輪腸胃唔多好，成程都唔舒服。
自由黨好多人，包括田少、劉皇發同丁午壽都弄孫為樂，八方問過肥仔張，幾時輪到佢，估唔到佢平時聲大大，一講到抱孫就馬上收口，話要由啲後生作主。
講開肥仔張，佢好緊張嘅吸煙條例小組，聽日就會去參觀諸如夜總會、酒吧等場所，據知除咗佢之外，阿富、大嚿、方剛、黃定光、楊孝華同埋兩位女將Audrey同卿姐都會走去見識見識，當係開吓眼界喎。
傳真︰2623-9278
電郵︰[email protected]