如果你係KONAMI名作《惡魔城》嘅Fans，睇怕嚟緊你都會幾忙碌；NDS版《蒼月的十字架》剛出咗一陣子，好多玩家都係話啱啱先打爆，PS2嗰邊又話推出全新作品《惡魔城闇之咒印》，今次重加入咗全新嘅「InnocentDevil育成系統」，同埋DIY武備
防具，令到玩法更加多變數！
記者：梁瑋瑜
《闇之咒印》其實係PS2平台上繼《無罪的嘆息》後第二個《惡魔城》作品，真Fans者，應該都知道呢隻遊戲曾在今個月頭推出過XBOX版本，不過喺香港，更多人期待嘅當然係PS2版本啦！遊戲有英文同日文可以選擇，香港玩家當然覺得更親切！
RPG經驗值成長系統
今集《惡魔城》再次採用3D立體製作，唔會好似NDS版本咁用橫向2D形式，難度亦會相對提高。《闇之咒印》故事發生於1479年，故事主角唔再係前作Belmont家族嘅成員或者德古拉，而係一向為德古拉效力嘅惡魔製造師––Hector，佢嘅愛妻俾佢好友Issac害死，整個故事就係圍繞住佢嘅復仇過程。
《闇之咒印》採用咗RPG常用嘅經驗值成長系統，打倒一定數目嘅敵人後，主角就會升級，而佢嘅攻擊力及防禦力亦會隨之提高。小記試玩過，今集動作十分爽快，而且畫面嘅流暢度都有所提高。
InnocentDevil幫手打
以往嘅《惡魔城》除咗靠自己一手一腳打，重會有召喚獸幫手，今集更加入咗新嘅「InnocentDevil」（ID）育成系統，新意十足。喺遊戲過程裏面，玩家會得到不同嘅ID，而呢隻ID會伴隨住Hector左右，每一隻ID嘅特性都唔同，會喺唔同嘅場合為主角帶嚟唔同嘅幫助，佢哋同樣會吸收消滅敵人後跌出嚟嘅EvoCrystal用作升級，換言之主角經驗值愈高，ID亦會隨之升級，升到最頂級後，ID會將之後嘅升級轉化成果實，玩家可以將果實帶去商店換取更強勁嘅ID。
DIY防具武器
《闇之咒印》喺家用遊戲中，罕有加入「自製武器合成系統」！一般同類「打怪」遊戲，多數都係從敵人屍體搜括武器防具，不過《闇之咒印》就轉接啲！打怪跌出嚟嘅，會係一啲「原材料」，例如記者在測試時，就在頭一排執到「青銅」；去到武器合成所，玩家就可以隨意將呢嚿青銅，打成劍、斧、頭盔、護甲等武備防具；不過要注意者，是愈到後排會跌出更稀有的「原材料」，不過佢係適合製作防具定武器，做把斧、劍定刀會令攻擊力有所增加，真係勁有研究空間！
另外，偷竊喺今集都係一個非常重要嘅技能，玩家可以喺敵人身上偷取金錢、道具等，另外亦有好多原材料都係要靠偷竊先可以得到，唔焗住做賊都唔得！
Profile
機種：PS2
類型：動作
生產商：KONAMI
售價：$418
查詢：DreamStore（25753285）灣仔東方188商場2樓256號舖
