大記者問朋友借咗架七人車，去機場接來自台灣嘅朋友，台灣朋友一家四口，卜咗迪士尼樂園內嘅酒店，歡度周末，一日行迪士尼樂園，一日去海洋公園，啱啱好。大記者盡地主之誼，做其柴可夫，順便遊吓迪士尼。
未去機場之前，中午先去馬會飲茶，碰到一位大老闆，順口問聲：「迪士尼生意好嗎？」大老闆面色一沉：「都冇乜人去，生意點會好呀？」大記者聽見就開心，冇乜人去喎，益晒自己一班人啦，排隊玩遊戲易好多。
接到朋友一家，直奔迪士尼樂園，兩個細路一見到間酒店，雙眼發光，歡喜到癲，上到房，二千七百蚊一晚，房靚，外邊風景靚，酒店靚，無一不靚，舒服晒！立即打電話訂枱食晚飯，西餐全部滿晒！時逢周末，冇客嘅話就慘情咯！中餐有位噃，出外玩咗一陣，入酒店中餐廳，原來係上海菜，大記者係上海總會會員，點番一啲喺上海總會經常食開嘅小菜。嚡，四小碟完全唔係嗰回事，龍井蝦仁差幾皮。台灣朋友在台北食慣好嘢，呢餐認真杰，四個大人食到你眼望我眼，食唔落，兩個細路就一味話：「都唔錯吖，快啲食完，又出去玩過！」
大記者同台灣朋友講：「世事好難十全十美，呢度風景好，裝飾好，服務好，禮貌好，只係中菜差得太緊要，算啦，有機會，再請你哋去上海總會食。」朋友話唔緊要，返上房，拎出台灣麥園鳳梨酥，一齊食，原來係全晚最佳食品！
晚上返到屋企，大記者先至睇報紙，見到美國和路迪士尼公司宣布第四季業績（截至十月一日止），業績倒退27%，賺三億七千九百萬美元，主題公園與酒店盈利上升一成，全靠加州與佛州兩個樂園，巴黎與香港樂園就虧本。其中香港迪士尼樂園嘅開幕前費用令集團盈利少咗一億美元，以此推算，特區政府佔57%股權，咪要蝕十億港紙？香港人去多啲迪士尼樂園啦，否則納稅人收唔番筆大投資㗎嘞。