濠賭股前日全面炒高，表現相當威，但噚日在銀河娛樂（027）勁跌10％拖累下，表現即刻走晒樣。
至於經紀陳話過街貨多、好難持續炒上嘅奧瑪仕（959），跌番7.53％，收0.43元，成交股數高達1.65億股，金額7360萬元。
不過，濠賭股中嘅信德（242）同埋由細佬主政嘅新濠（200）就仍然保持硬淨，尤其係信德昨日出現多手非自動對盤成交。經紀黃話，江湖傳聞係有芬佬要貨。其實信德近排相當積極，早排更遠赴英國搞路演，多間證券行發表報告推介，所以企得硬淨係有原因。
信德昨日最高見過6.75元，收6.70元，升1.52％，成交股數2858.8萬股，金額1.87億元，其中非自動對盤成交佔咗12.8球。
信德日前炒高，原因就係話可能獲注入澳門娛樂嘅非博彩生意，查實信德嘅地產業務相當賺錢，據講在澳門嘅濠景花園銷情十分理想。信德有咁多利好因素，有芬佬買入一啲唔出奇。
慕容小初