特區政府呢幾年年年都話要推創意工業，老董腳痛前吹咗幾次雞、喺CGO搞咗幾次文化創意界吹水大會，阿肥佬何都係問責吹水制高手，當然要同老董吹埋一份，又係得個吹字，有吹水唔抹嘴，實事就冇人做嗰種，人哋日本韓國政府推創意產業，一步一步咁做，做咗幾十年，教育投資咗好多，政府又身體力行，唔會好似香港政府咁講一套做一套。
肥佬何爭吹創意工業嘅風頭就有，做起上嚟一啲都唔掂，文化藝術講咗十幾二十年，話要搞間國際級嘅視藝學院同電影學院，政府都唔做，呢排又靜雞雞叫浸大搞視藝學院，成個文藝創意界都𢱑爆頭。
清輝聽話任佢點
浸大根本唔掂，中大至少都有幾十年嘅藝術系，理大又有設計系，浸大負責嗰位文學院院長鍾玲教授係文學專家，但係唔係視覺方面嘅專家，江湖傳聞話畀浸大咪係因為肥佬何覺得阿清輝好控制，聽聽話話，任佢點囉。
肥佬何精通中國官場任人唯親嗰套，呢幾年搞到香港文藝界雞毛鴨血，以前兩個市政局喺度都有班議員理吓文化藝術，𠵱家唔係有西九，立法會班大爺鬼理你，肥何咪亂搞囉，老董又管唔掂佢，有次創意產業吹水大會，成班學者文化創意界精英都向老董投訴肥何點唔掂，乜都冇做，剩係搞啲大show，要嚟畀自己同祖國高官搞關係，總之肥何一日當官，香港文藝界都冇好日子過，香港政府話要大力推嘅創意產業又係得啖笑嗰隻。
文化怪士
傳真︰2623-9278
電郵︰[email protected]