CEPA推出接近2年，不過藉此進軍國內嘅港商唔算好踴躍，原因之一係到國內做生意時，經常會遇到各處鄉村各處例嘅情況，要落實執行CEPA好有問題。
針對呢點，穗港兩地噚日率先成立咗個CEPA協調小組，由廣州市對外貿易經濟合作局同香港貿發局牽頭，會以個案轉介、定期會議同雙方指派專責協調員嘅形式，協助港商解決喺辦理企業審批同個體戶申請時遇到嘅困難。
貿發局副總裁黃錦輝介紹，至今年10月底，已累計有8824項港貨可透過零關稅進入國內，主要係紡織成衣、藥用護理、食品飲品、塑膠、紙品印刷等貨品。至於服務貿易方面，則有879項已取得香港服務證書，主要係運輸物流、分銷、廣告、建築工程同會展服務等。佢話如果呢個小組成功，希望可以將協調方案拓展至其他省市。