後市看好，但估唔到嘅，就係咁快就升穿15000大關，10日線（14778）好快會升穿50日線（14798），確認中期上升大浪開始。
噚日恒指大升176點，高收15062，淡友被殺個措手不及。事實上，大市在禽流感疫情籠罩，以及息口一路走高的趨勢下，唔少人認為大市近日的回升，只係反彈，彈完會再尋底。但係，息口形勢突然有新的變數，促使資金又再大舉流返入市，對息口最敏感嘅地產股，升勢亦最急勁。
一直以來，美國聯儲局都係話會循序漸進咁加息，而一般人亦預期美國在未來半年會加多三至四次息，但根據聯儲局嘅會議紀錄，原來委員們對息口調升嘅看法已不一致，有兩三人已開始質疑加息嘅步伐是否太快，進而影響到經濟嘅發展，若持異議者人數愈來愈多，則聯儲局加息的步伐將會放慢，甚至唔排除息口即將到頂。
初步目標3.85元
加息周期接近尾聲，將會受惠嘅，係銀行同地產股。滙控（005）除息，收125.50元，升0.90元；長實（001）同新地（016）一洗頹風，分別大升2.25元同1.70元。中移動（941）整固完成，又再上過，收38.10元，升0.70元；和黃（013）亦威番1日，高收75.80元，升1.70元。
個人對後市看法好樂觀，恒指在短期上升目標15200水平略作整固後，估計1個月內，有機會向16000大關進發。大藍籌帶領大市向上，可博入C輪，滙控可選4869同3843，和黃係9043、長實嘅9056同中移動嘅9306。
國企指數走勢亦出現突破，收5104，升64點，早輪在3.425元時推介的中石化（386），在3.60元水平整固已有多日，20日線（3.404元）亦已升破50日線（3.384元），確認升浪開始，升破3.625元阻力，初步上升目標係3.85元。短炒C輪可吼9292，06年3月到期，升穿0.30元阻力，照度上去，上升目標係0.41元。
中國政府好快會改革成品油價格機制，中石化下游業務規模龐大，成品油價鬆綁，對佢最有利，多家大行亦提升中石化的投資評級，推薦買入；高盛的目標價係4元、里昂係4.20元，花旗美邦最樂觀，目標價係4.69元。
郭兆誠