為紀念功夫巨星李小龍嚟緊星期日六十五歲冥壽，籌備八個幾月嘅李小龍銅像噚日終於由廣州運送嚟香港，屹立喺香港星光大道，銅像原定噚日朝早九點到達，但因為搬運需時，加上交通問題，搞到下晝四點先搬個銅像去星光大道。
選經典甫士
銅像分為兩部份，上半身就用紙皮同發泡膠包住，要到星期日揭幕儀式先會開封畀大家欣賞，下半身個底石就刻有「世紀之星李小龍」嘅稱號。為銅像操刀嘅廣州著名雕塑家曹崇恩、電腦動畫大師馬富強同插畫大師阮大勇都有到場監督，吸引唔少自由行遊客駐足圍觀。
曹教授話：「今次個銅像籌備咗大半年，我對李小龍都相當了解，係要花時間去研究取材同動作。」而馬富強就話：「今次個動作係揀自《龍爭虎鬥》入面最經典嘅李小龍姿勢。」曹教授話同圈中人好熟，佢話：「梅艷芳死後我都有幫佢做銅像，不過未送去畀梅媽。」
