下半年甲級寫字樓市道依然理想，一向熱炒嘅金鐘力寶中心，斷估應該順理成章繼續位列榜首，但若果咁諗，就大錯特錯，因為原來隔籬街嘅中環美國銀行中心，至係真命天子。
卓先地產報告，下半年至今，美銀中心一共有十五宗買賣紀綠，比起力寶中心嘅九宗，多出六成幾。美銀中心嘅交投，合共涉及樓面六萬五千幾呎，比起力寶中心造到嘅二萬五呎，贏出成條街咁多。
唔怪得美銀中心今個月嘅造價，較舊年同期大幅上升兩成四，每呎高見八千五百五十；力寶呎價只係造到八千二，升幅為一成七。
卓先地產方面分析話，呢兩幢指標寫字樓嘅市況此消彼長，同政府計劃喺對面添馬艦起新總部，令附近商廈海景出現變數有關。
電郵地址：[email protected]