南粵物流（3399）噚日果然開車，股價全日勁升10.62%至3.125元，成交達4053萬元，黑客今次總算有交代。
阿虎問黑客點睇，佢話隻股應該重未真正開車，噚日嘅升勢可能只係巧合，而咁啱又有散戶跟進博反彈，提防大戶隨時玩震倉。不過該股最近獲德銀增持至8.11%，相信股價於年底前會有櫥窗粉飾活動支持，重上3.45元招股價水平應該唔會太難。
先施錶行基金增持
另一隻半新股先施錶行（444）上市後破底，但近期亦獲基金CharteredAssetManagement增持至6.04%，股價噚日升3.09%至1元，距離招股價1.08元不遠，隨時可浮回水面。CharteredAssetManagement主要是透過旗下CAM-GTF持有該股，而CAM-GTF主要是投資於東南亞的股票、債券、換股債甚至窩輪，據聞投資策略頗為進取。
交行（3328）午後突然一沉，股價跌近3%至3.25元，但其後有華資買盤護價，全日跌幅收窄至0.74%，收報3.325元，成交2.3億元。據聞噚日有基金出貨鎖定利潤，為年結作部署，導致股價打咗個冷震。
交行以2.50元招股上市，以噚日收市價計，獲得配售嘅基金大戶帳面賺33%。以基本因素而論，大戶並非全面睇好交行，唔少嫌佢定價貴得滯，所以沽交行追建行（939）其實諗得過。噚日大摩在2.525元力壓建行，沽盤唔細，嚇親唔少散戶。不過呢個可能係低吸良機，一旦下周衍生工具發行商爭發窩輪而入市搶購正股，到時建行股價可能出現三級跳。
DBS叫沽華潤置地
華潤置地（1109）以32億元作價，發大量新股向大股東收購內地多項收租物業，雖然DBS警告呢宗交易會大大攤薄每股盈利，呼籲投資者先行出貨獲利，但近期投資者鍾情內地地產股，繼續高追華潤置地，股價再升4.67%至2.80元。
阿虎