個別二三線股似乎又活躍番，其中搞展覽的筆克遠東（752），亦獲得細摩出報告推介，話估計筆克會因為亞洲區內展覽行業的強勁增長而受惠。筆克近年發展招牌廣告同埋展覽館管理生意，尤其係前者更獲睇好，所以set到個目標價2個幾咁多。
經過大行推介，筆克昨日一度彈升至1.92元，收1.87元，升6.86%，成交股數417.5萬股，金額780.9萬元。
查實筆克喺今年7月份，因為公布中期業績靚到震，所以股價一度由唔夠1.3元升至接近2元，但因為由1元邊開始買入的金手指，開始喺接近2元水平沽貨，所以過去數個月以嚟，筆克遠東股價保持平穩，但直到近日唔知係唔係因為金手指批貨悉數沽完，隻股終於又再起航。
另外，濠賭股昨日失驚無神回勇，但經紀陳就話，濠賭股跌咗咁耐有人睇起並唔奇，雖然奧瑪仕（959）昨日急升22.37%，收0.465元，但經紀陳就認為，濠賭股今非昔比，況且奧瑪仕股數多，要長時間持續炒上並非易事。
慕容小初