在屋企附近踩單車，蒲咗成世九龍城，先至第一次幫襯宋王臺公園，原來嚿石都好大嚿。深夜在九龍塘踩單車，除了間中有幾對情人或非情人開房之外，實在非常清靜，甚至靜到有啲得人驚，九龍塘與又一村的交界處是一條火車路，路邊竟然重有一啲種花種草嘅田地，於市區內的微型阡陌附近踩單車，吸入的空氣也有陣鄉土味。九龍城與新蒲崗交界處有條大水渠，估唔到有人會喺度釣魚，釣到都唔知敢唔敢食？附近尚有一個舊式社區，有鐵皮屋理髮店，生意好起上嚟，顧客就坐在街上披住塊大膠布飛髮，似十足粵語長片中的畫面。
近日發生的單車意外叫人痛心，唔踩單車又真係冇咁覺，香港的汽車駕駛人士確係唔太尊重單車，完全唔當踩單車嘅亦係道路使用者，明明自己在大路，私家車由細路出大路，望你一眼見係單車一架，踩油便攔腰駛出，唯有狂煞掣加怒目相向，私家車司機雙眼反白睬你都儍，大貨車見到單車更加係恰得就恰，不過皮包鐵同鐵包皮都係撼唔過，閃埋一邊算數。
連政府都非常睇唔起單車，前幾天踩單車到公共網球場打網球，非常守規矩地一入公園範圍便落車推車，點知管理員仍一個箭步衝埋嚟：「呢度唔准單車個噃」，「我知，所以我咪落車推囉」我有禮貌地答道，「推都唔得，呢度係唔准單車㗎，放喺出面啦。」放喺出面打完波返嚟渣都冇啦，「咁我最多𢭃起架單車，連對轆都唔着地啦」，「咁都唔得，因為呢度唔准單車㗎！」「有冇搞錯?!踩單車嚟打網球係天下間最健康與正經嘅事，咁都唔得？咁我唯有話你聽，呢架並唔係一架單車，佢其實係我細佬，叫做Peter，不過生得似一架單車。」如此這般，才能將細佬Peter孭入公園，你話係咪激死人！