星期六冇馬跑，下午做乜好，惡佬明選擇咗去睇樓，睇樓唔等於買樓，而係香港人嘅周末節目，冇錢買都去睇吓人哋有錢人家嘅豪宅點靚吖。
惡佬明選咗一個享有沙田無敵馬場景嘅「豪宅」樓盤去睇，入去免費停車場，有地產代理追到實，一停低架車，佢哋已經上氣唔接下氣咁介紹樓盤。惡佬明話：「唔使麻煩你哋咯，呢個盤我十年前已經睇過，再嚟睇吓有冇翻新啫。」走上去睇吓，外牆煥然一新，污水管都係新貨，大業主係落過本錢噃。不過，一個風景好，面臨城門河，面對彭福公園馬場嘅樓盤，要等十年先至推出市場，大業主從不計較綁住咗嘅資金與利息，確實世間少有，全世界都唔會有同樣事情發生。
示範單位的確靚，只可惜兩個單位打通，叫做相連單位，成二千一百平方呎，只得兩間大房，三間細房，最細嗰間睡房擺一張麻雀枱落去，四個人已經塞住。香港人認真可憐，千一二萬元買間咁嘅屋，日日有河景、馬場景睇，都補唔番啦。
惡佬明跟住去火炭探朋友，朋友住響二十年樓齡舊樓，兩部電梯時好時壞，朋友從八樓行樓梯落嚟接佢，面有慍色，好彩部電梯又聽話番，載到佢哋上八樓，一入門，咦，一千三百幾呎屋，同正話睇過嘅二千一百呎屋好似面積差不多咋噃，有三間大房，一個書房，四四正正，重好用啲㖭。不過朋友話：「舊樓暗病甚多，有幾層樓漏水，電梯唔可靠，老人家成日提心吊膽，舊樓有舊樓煩惱。」
附近有一新樓盤，未入得去睇。幾幢高樓之前，有三間所謂獨立屋約三層高，居然前後都用大量玻璃，重係唔開得嗰隻，形同透明。點住呀，人哋行過都望到晒噃，相信住客日日要住在昏暗中，俾窗簾遮到實一實。惡佬明嘆曰：「大業主貪心，應該種樹嘅地方都起埋樓，建築師又設計得曳，用二三千萬買呢啲屋嘅，唔知係乜嘢人，如果唔係視錢財如糞土，就係IQ低。」