是日恒指高低波幅91點，埋單升0.08點，好友冇贏，淡友冇輸。期指低水53點，計入滙控（005）今日除息1.09元拖低恒指39點，恒指實係低水14點，冇乜啟示。
賭大市上落，最直接辦法當然係炒恒指輪。𠵱家上落一二百點等閒事，吼個市跌之時，低位買恒指C輪博個市升番上去，亦可吼個市升之時，低位買恒指P輪博個市調整番落去。
恒指C輪9729：恒指C輪9729係熱門貨，明年4月尾夠鐘，輪價21.7仙，溢價3.9%，槓桿率17.2倍（有效10.2倍），引伸波幅18.6%。恒指每變動100點，隻輪理論升跌幅7%。講贏得多與蝕得勁，唔係呢隻。
想贏輸大，贏輸快，搵搏殺C輪，則係下月尾夠鐘嘅3462。恒指每變動100點，3462輪價理論變化12%。
恒指P輪9355：恒指若升多一二百點，博回頭，買恒指P輪9355，明年2月尾夠鐘，輪價21.1仙，溢價1.8%，槓桿率15.2倍（有效9.9倍），引伸波幅19.3%。
恒指每升跌100點，9355理論跌升7%，爆炸力與殺傷力未致於過於厲害。想更刺激，揀年尾到期嘅9024，恒指每100點嘅變化，隻輪理論升跌19%。
章盛