特區政改方案有冇第二手準備，或者幾時剝牙讓步𠵱家都冇人知，但係時間就唔多，八方噚日問班官，有冇諗過押後下個月二十一日嘅表決日期，佢哋即刻話冇，因為煲呔同肥龍冇乜嘢可以畀到班民主派，所以拖冇乜意思，真係好硬淨喎，大家會放長雙眼睇㗎喇。
轉軚議員好難做人
咁想做中間人拉埋兩邊天窗嘅飛哥又點睇呢？八方噚日啱啱喺君悅撞到飲緊下午茶嘅飛哥，佢話𠵱家真係左右做人難，因為民主派都嫌佢個方案太慢，而佢就覺得先係二○一二或者二○一六年搞立法會普選，然後二○一七搞行政長官普選已經唔錯，大家都夠時間做準備。不過，如果中央同特區政府明知唔夠票都硬闖，咁一係有鬼，即係有人到時會轉軚；一係原地踏步，四大皆空。
據飛哥分析，兩個結果都有後遺症，如果有鬼，咁嗰幾位轉軚民主派議員將來好難做人；如果原地踏步，有人可能會告上官府，話政府失職，因為冇按《基本法》規定，循序漸進（咁煲呔可以攞個有三分二議員支持嘅新方案出嚟），所以政府都幾頭赤。
政改不嬲都唔易搞，睇怕到𠵱家只有肥龍一個人識笑，重話貨真價實，絕冇欺騙㖭。八方八○年代跟過港督尤德上京，當時又係傾政改步伐，焦點係幾時先有直選議席，香港民主派要八八年立法局有直選，北京死都唔畀，結果尤德客死北京英國大使館，中英最後妥協，九一年先畀十席。
之後又到肥彭做末代港督，唔理北京反對，搞個變相功能組別普選，飛哥當時都想力挽狂瀾，結果一票飲恨，所以政改一啲都唔易搞，肥龍呢鋪未至要死嘅，亦不用下台，因為有煲呔保住，但係一定要努力度橋脫身喇。
煲呔話有小小空間，胡主席扮冇事，但係中方肯定急如鑊上螞蟻，因為唔想煲呔大敗，以後點強政呢？所以佢哋正密切關注下個月四號遊行人數，重四圍收風放風，以免失控。
BBC搵湯家驊做訪問
另邊廂，民主派議員目前已人在歐洲，打緊國際牌反對政改方案。八方聽聞，45條關注組大狀湯家驊星期三上午喺布魯塞爾開完會後，就要直奔機場去倫敦，咁趕時間，係因為BBC時事節目《HARDtalk》約咗佢做訪問。
《HARDtalk》訪問對象主要係各國政要，StephenSackur上次訪問到訪嘅煲呔時做足功課，提出中大民調指多數香港人希望○七、○八有普選，質問煲呔為乜阻礙民主進程？煲呔以標準答案耍太極。湯大狀呢次就要喺相同平台，揭穿政改方案真面目，再同煲呔唱對台戲，真夠膽！
爆料熱線：29290000、27860099
報料傳真：26239278
報料電郵：[email protected]