亞視今日會搞二○○六年嘅節目巡禮，向有關廣告客戶推介明年嘅節目安排。
馮仁昭睇過佢哋嗰本小冊子，亞視諗住喺劇集方面重鎚出擊，亞視戲劇及藝員營運副總裁楊紹鴻會親自做監製拍台慶劇《義無反顧》，呢個劇嘅內容係講商界鬥爭，揭露人性醜惡一面，楊紹鴻話暫定卡士有曾江、郭藹明、譚耀文、呂晶晶、葉德嫻同鮑起靜，佢又話：「我哋會用一班實力派演員去帶領公司嘅綠葉新人演出。」
籌拍奇案劇
另外，亞視有見無綫今年搞嘅《殘酷一叮》大受歡迎，唔少小朋友踴躍參加，所以亞視出年會搞一個《超級小偶像大賽》，希望發掘一啲有演藝潛質嘅小朋友。
亞視又會籌備新劇《香港奇案實錄》，以一啲真實個案做拍攝題材，以單元式故事播映，暫定會安排亞洲先生冠軍趙涌、陳啟泰同張文慈演出。
