是日恒指高低波幅98點，埋單升2點。日股由大升變下跌，收市仍有進帳，畀咗港股少少指引。港股近期連番上升後，逐漸擺脫咗禽流感嘅影響，短期內，恒指每日幾十點波幅上落，股票個別發展，好正常。
和黃C輪4872：和黃（013）收73.70元，升0.40元。大行耐唔中指指點點，多數畀正面評價，昨日輪到高盛出報告，話和黃現金流、盈利與資本回報唔錯，「貼」和黃目標價101元，評級係跑贏大市。
對於大行報告，不必認真，一時一樣司空慣見。炒家自己做自己嘅嘢算數。吼和黃回落1個幾毫，短炒C輪，對象係4872，明年6月尾夠鐘，輪價86仙，溢價4.3%，槓桿率8.6倍（有效6倍），引伸波幅24.9%。呢隻係波幅較小嘅和黃C輪，想搏殺，向4887埋手。輪價0.083元，年底到期，溢價6.7%，槓桿率88.8倍（有效23.1倍），引伸波幅23.4%。
港交所C輪9126：港交所（388）派完季度成績表挫一挫後又升過。PE雖然唔低，但勝在生意唔憂，外國同類股PE更高。港交所C輪9126有得諗，不過因為係1兌1，輪價大，散戶心理上有抗拒感。講數據，槓桿率唔高，但又接近平水。
章盛