澳洲居然打敗烏拉圭，進軍世界盃，令人感到意外。以波論波，烏拉圭有贏過世界盃嘅傳統，足球係國技，而澳洲球員係散兵游勇，國內搵唔到食，四散在歐洲搵銀；澳洲四大體育項目係板球、欖球聯賽、欖球聯盟及澳洲式足球（可以手腳並用），足球唔流行，應該係烏拉圭佔優嘅。
澳洲烏拉圭打到加時，雙方球員已經腳軟，烏拉圭球員更軟多一啲啲。哈，就係呢「一啲啲」，烏拉圭就竟然射失兩個十二碼飲恨。事後找尋死因，皆因烏拉圭足總想玩嘢，但唔知道自己辦事能力差兼且國家冇銀所致。
第一場波本來訂喺下午四點開波，烏拉圭足總臨時話要改到晚上九時，想話害到澳洲球員不能及時搭到飛機回國，要等到第二日朝早，而自己就可以提早出發。澳洲強烈抗議後，國際足協下令場波在下午六時舉行。本來都冇事吖，點知烏拉圭足總擺咗烏龍，租唔到包機，直飛澳洲，賽後要球員飛去智利首都聖地牙哥轉乘商業航機去雪梨，但臨時冇商務機位（一早book滿晒），只得坐經濟艙，後來去雪梨之時，班到一啲商務客位，於是烏拉圭啲大隻佬，輪流到商務客艙瞓覺，醒吓又瞓吓，唔攰有鬼，到咗雪梨，咪烏眉瞌睡，球場上捱到加時，已算佢哋好波。
反之，澳洲有錢，Qantas一早預定一架二百二十人航機畀澳洲隊三十五人坐，二十三位球員大把空位任瞓唔嬲，飛機中間設置按摩台，球員輪流按摩四十五分鐘，一路直飛雪梨，都唔知幾舒服，而且因為咁他條，領隊訂下規矩，球員要依照雪梨時間睡覺，避免jetlag。呢班球員返到雪梨，人人精神奕奕，體力充份復原，故此球員技術組織雖然差啲，仍然可以憑射十二碼贏咗。去到世界盃足球咁高層次，豈止係球員技術大比拼，更係組織力與財力嘅大比拼。