恒和珠寶30周年搞咗個慶祝酒會，主席陳聖澤一家總動員出動，畀面到賀嘅賓客甚多，除咗陳主席嘅自由黨黨友田北俊、周梁淑儀、楊孝華、梁劉柔芬、丁午壽外，重有鄭裕彤、電盈蘇澤光、九巴陳祖澤、鷹君羅嘉瑞、施祖祥、玩具大王蔡志明伉儷、練馬師告東尼伉儷，真係乜界別都有，場面好鬼熱鬧。
陳主席同華華講，當初開業時得20幾人，家吓員工就有3000，3個仔女都喺公司幫手，大女慧琪負責零售、二仔偉立就做銷售，細女美琪搞推廣，3個都咁幫得手，陳主席同太太鄭小燕真係飲得杯落。
近排較少露面嘅彤叔，到場後就好入神咁睇鑽石，但佢話好少買畀老婆，因為大家係講心唔講金，重話老婆永無「詐型」。佢又話，雖則最近加咗息，對樓市有小小影響，但只會靜一排，之後就會平穩發展，所以買樓同買鑽石一樣保值，佢都認購咗收租為主嘅領匯，至於用咗幾多錢，就唔話你知啦！
彤叔同華華講，家吓無乜點理業務，只係日日返公司行吓，睇吓報紙，同埋畀人見吓自己囉！傾到咁上下，終於有人開聲問佢緋聞女友Candy嘅事，俾人篤中，彤叔即刻耍手擰頭，走夾唔唞。
李華華