究竟一部PSP除咗打機、睇片、聽歌同睇相之外，重有冇其他用途？當然有！PSP最近推出咗一隻叫做《TalkMan》嘅應用軟件，跟Game有個咪，用家對住個咪大聲講，就可以幫你將普通話、英語、日文及韓語四種語言互相繙譯，唔單止啱去旅行用，用嚟結交外國朋友一樣有計！
記者：梁瑋瑜 攝影：陳智良
ImageModel：Vincent（Starryland）、Rikii（Starzpeople）
爆笑叫餐實錄
《TalkMan》喺現實中係咪真係咁Talk得？我哋特意請來熟讀普通話的香港男生——Vincent，同土生土長嘅日本靚女Rikii，試吓喺露天茶座做個「叫餐」測試，過程中唔准玩身體語言，亦唔畀眉目傳情，只可以用《TalkMan》做「溝通」橋樑，都幾爆笑吓！
餐廳開場白：100分
條件：普通話＞日文
Menu點餐：50分
條件：日文＞普通話
評價食物：100分
條件：日文、普通話互譯(+模範問題及答案)
Vincent同Rikii喺測試《TalkMan》後，都覺得佢個語音辨認能力都算OK，而且勝在模範句子夠多，總會搵到相類近嘅問題同答案，帶佢出門，真係幫到手喎！
Profile
售價：$399（連咪）
開發：SonyComputerEntertainmentInc.
SonyStyle（23452966）
(c)SonyComputerEntertainmentInc.
雀仔主角反應趣怪
跟機嘅咪插喺PSP嘅USB口就可以用，唔需要任何設定過程，體積亦十分細小，就算帶出門旅行都好方便，記者試過喺比較嘈雜嘅街上使用，接收能力都算唔錯。
雖然話係實用軟件，不過個介面設計亦見心思，《TalkMan》裏面有一隻叫做MAX嘅雀仔主角，精通普通話、英語、日文、韓文四種語言，要繙譯就靠晒佢，最過癮嘅係MAX會做出唔同表情，好似當用家講咗一啲佢聽唔明嘅語言，佢就會眼都突埋出嚟，睇見佢個樣真係好趣怪！
繙譯旅行常用句
雖然MAX精通多國語言，不過佢只係識得同旅遊有關嘅語句，好似飛機場、酒店、餐廳等共十多個場合常用嘅會話，但係對於去旅行嘅人嚟講相信都好夠用。
用家選咗場景之後，只要按住「□」掣，就可以同MAX講你想繙譯嘅句子，而用家使用嘅語言同埋繙譯出嚟嘅語言，就隨時都可以設定，相當方便。即使MAX認唔到你所講嘅嘢，佢亦會提供大量模範句子俾你揀，當中梗有一句啱用嘅，不過句語意思就梗係冇咁直接啦！
測讀音有幾準
去到外國地方，淨係對方聽得明你講嘢都唔夠，重要對方講嘢你聽得明先得，《TalkMan》亦好為用家設想，當用家問完一個問題，MAX會提供多項答案畀對方揀，對方亦可同樣對住咪講俾MAX聽，咁周到嘅設計都值得一讚。
除咗繙譯功能，《TalkMan》重設有讀音模式，用家先選擇難度，然後跟住提供嘅句子照讀，MAX就會根據你嘅準確度畀個分你，用家大概可以知道自己會話能力去到咩嘢程度，對於初學外語會話嘅朋友，都算係一個好玩嘅環節！
老外實試 遊客慣用語
香港不嬲出名多遊客，小記專登拎咗隻《TalkMan》去尖沙嘴海旁，畀外國遊客試試，究竟《TalkMan》認佢哋講嘢認得好唔好，佢哋又覺得有冇用呢？
Load碟實在太慢
試咗幾句唔同嘅問候用語，包括「Howareyou?」、「Nicetomeetyou」咁，覺得《TalkMan》算認得幾準，不過就略嫌Load碟太慢，真係用起上嚟唔係太方便。
日韓繙譯較實用
認聲方面覺得好準確，幾驚喜，而且估唔到PSP都會出啲咁有用嘅嘢，不過嚟香港玩咗幾日，基本上同香港人用英文溝通問題都不大，可能要拎去日本或者韓國會有用啲。
介面唔夠Friendly
選咗「MeetingPeople」場景試玩，不過講「Hello」都認唔到，之後試咗「What'syourname?」就得，唔太明白場景點分類，試嚟試去好麻煩，介面有改進空間。
