本地電訊市場競爭激烈，其中流動電話方面已經出現多次併購活動，當中有喜亦有悲，喜者當然係SUNDAY（866）被電訊盈科（008）併購，同埋華潤萬眾（331）被中移動（941）收起，而唔多開心嘅當然係新移動（862）公布與CSL合併後，股價一路係咁跌。
城市電訊（1137）噚日公布截至今年8月全年業績，虧損2.064億元，係公司開業13年以來第一次蝕錢，可想而知電訊生意競爭係幾咁激烈，雖然城電股價近排已喺0.77元的低位徘徊，但業績公布後，估計今日股價仍然難逃一跌。
另外，近期大陸地產股忽然熱炒，昨日公布收購深圳萬象城的華潤置地（1109），復牌後股價即炒高10.31％，收2.675元。至於其他同類股如百仕達（1168）亦升3.24％至1.91元，升上近年新高。經紀黃話，有潛力而未全面炒上嘅同類股，重有上海置業（1207），隻股本月初才配售債券集資，現價1.11元，相對其他同類股份落後好多。
慕容小初