孫明揚、周梁淑怡、著名設計師陳幼堅前晚喺灣仔會展，出席「香港設計師協會獎05」開幕及頒獎禮，現場重展出超過七百件包括平面設計、產品設計等嘅得獎作品。協會顧問霍震霆亦有到場，佢話：「今日同啲叻設計師攞吓心得，遲吓搞東亞運動會，好有呢方面需要。」八方問佢屋企裝飾設計係點？霍Sir話：「我對室內設計冇天份，但有興趣，我屋企好古老，以西式為主。」問佢幾耐裝修一次，霍Sir竟然話「我五十年不變！」
香港成日講創意工業，霍震霆呢個答案就真係創意欠奉。近期佢太太朱玲玲出席活動，除去夫性以朱小姐身份自居，令霍Sir嘅婚姻狀況再次成為傳媒焦點，一提到離婚傳聞，佢就一臉尷尬咁話：「今日咁開心，唔好問呢啲啦。」八方惟有八卦吓佢位大公子霍啟剛同郭晶晶喺北京置業嘅傳言，霍震霆一面無奈，拉住朋友猛話：「喂，邊個救吓老友，幫我殺出重圍！」
爆料熱線：29290000、27860099
報料傳真：26239278
報料電郵：[email protected]