呢排成日見星仔踩單車，只要環境許可，一律以單車代步，呢度去，嗰度去，享受一人樂趣，既悠閒，又健康，我其實自細已經好喜歡單車，非常享受嗰種無拘無束、完全獨立自主，只可惜細個嘅經驗唔多愉快，踩單車時成日被人撩，嚟嚟去去都係嗰句：「肥仔因住責爛架單車喎，嗱嗱嗱就爆胎嘞」，相當冇癮。
心郁郁買番架單車，四圍去睇車，方知道單車已經發展到咁嘅地步，車身輕到一隻手指𢭃得起嗰啲唔太啱我，反而紮紮實實嗰種就係晒我杯茶，前後獨立避震，碟式煞掣，一世保用合金車架，三大九細總共廿七個波段，簡直就係一件藝術品。價錢都幾揦脷，但愛因斯坦兄講得好，一切都係相對嘅，鍾意嘅就唔會覺得貴，唔鍾意嘅就送畀你都嫌阻碇。
秋天是香港最美麗的季節，涼風送爽，踩單車一百巴仙與大自然接近，揸開篷車完全冇得比。為了自身安全同時也別讓老媽子擔心，盡量選擇在人少車少的時間踩單車，吸入的空氣也較清新，最怕一邊做運動一邊吸廢氣，當然最好係去單車徑，可惜全部冇雷公咁遠，上網搵單車徑路線圖，所得少之又少，到政府網頁又摷來摷去摷唔到相關資料，只在單車發燒友的Newsgroup中找到一些推介……（待續）