最近政府好似發咗神經咁起勢喺電視賣告白，各式各樣都有，係咁意數一數：李克勤與胡杏兒輪流出場提醒大家換領智能身分證，Do姐提醒出門要買旅遊保險，劉德華唔止教大家今時今日咁嘅服務態度唔夠，最緊要係賣正貨；先有阿旺同老婆仔，祿叔再接力話畀大家聽世貿有咩好處；詹瑞文一個打九個落力演出講述二手煙的害處；成龍大哥教司機們勿胡亂切線，方為大師父。
非名人組系列的題目更多，首先日播夜播教大家點去欣賞國歌，最緊要心繫家國，賣豬肉要帶手套，買雞唔好吹雞籮柚；小朋友記得要洗手，行山要小心，勿在山澗玩耍免被洪水沖走，大時大節睇煙花要注意安全同埋執番自己啲垃圾，開車前咪飲酒，坐小巴記得要扣安全帶，去公共泳池唔好屙嘔，切勿濫用救護車，寶寶龍教小朋友要識sayno，關注老人被虐及被掉晒啲嘢出門口，青少年性的疑惑你唔同佢講大把人同佢講，通識教育如何終身受用，成年人應積極人生接受持續培訓，租屋要睇清楚合約，定期檢查鋁窗，舊樓要定期維修，你玩藥原來藥玩你，裝修換浴缸地板要磅水畀垃圾棄置費，一早同老闆傾好如果有暴雨警告便唔使返工，非法在斜坡耕種會導致山泥傾瀉，離婚都記住要定期畀贍養費……
求其數吓都已經一大籮，究竟係香港市民嘅質素真係江河日下，行步路都要政府提點？還是全部來自卸膊條款，第日有咩事發生都可以大大聲聲話一早賣咗告白啦？
港產片產量買少見少，有咩辦法可以轉行拍廣告片，如果接到政府呢個大客就發嘞。