被喻為改革開放先驅的廣東省前第一省委書記任仲夷，上周於廣州病逝，媒體同網民都對任老表達懷念之意，對於呢位元老金融圈可能較陌生，但任老的後人，喺財經界都好巴閉，佢位千金任克英，係花旗前亞洲區副主席兼中國投資銀行總裁。任仲夷與前總理趙紫陽係姻親，任克英正是趙紫陽的媳婦，任老的兒子是深圳華僑城集團老總任克雷，另一子任克禮則是中央高官。
任克英是普林斯頓高材生，在貝爾斯登嶄露頭角，在主管花旗中國投行期間，連取中國人壽、網通、民生及建行4個大deal，前年6月，佢忽然被指提供虛假訊息，遭花旗停職，之後便銷聲匿迹。對上一次露面，是今年初趙紫陽逝世後，電子媒體在北京富強胡同趙宅院內，拍攝人們前往吊祭時，喺趙家成員行列中發現佢。華華聽聞佢曾經想在港打官司，告乜就未知，而1年內辦兩次喪事，亦一定好煩擾。
任克英離開後，花旗就冇咗建行單生意（今年全球最大的IPO），可見一個巨大企業，有時仍要靠一些關鍵員工。
講起建行，該行董事長郭樹清接受新華網訪問，透露上市前後一啲趣聞，郭總話建行招股書修改幾十次，路演時見過幾百家機構，引入美銀同淡馬錫兩個外資股東，郭總形容係佢哋談判團隊嘅努力成果，話佢哋精於計算，有時甚至擔心佢哋過於精明。
至於上市後幾日，建行股價徘徊喺2.35元，郭總同外國朋友開玩笑，話佢係用咗每秒100億次嘅計算機計出嚟；佢話其實招股價訂出前，加過兩次，所以投機空間好小。
李華華