張學友和陳奕迅（Eason）昨日分別夥拍去年奧運網球女子雙打冠軍李婷及孫甜甜進行一場「東華慈善名人盃表演賽」，學友與李婷一隊最後以六比二勝出，但學友卻慘中Eason波餅，他賽後表示自己於球壇十年，首次被打得這麼傷。
張學友、陳奕迅和李思雅昨日在銅鑼灣出席「歡樂滿東華慈善網球大賽」，大會安排學友和Eason分別夥拍去年奧運網球女子雙打冠軍李婷及孫甜甜進行一場表演賽。
頻頻用手按摩
經抽籤後，張學友與李婷一組，陳奕迅與孫甜甜一組，雖然學友與李婷最後以六比二勝出，但學友頸部慘食Eason波餅。
學友食波餅後右邊頸部通紅一片，他不時用手按摩，Eason亦開玩笑問學友可有買保險。問學友是否感痛楚時，他說：「痛呀，都好大力㗎！我喺球壇成十年，第一次俾人打得咁重，等我下次兜口兜面開（波）落佢塊面先。」問學友可有考慮參加球賽時，他說：「講笑啦！比賽咁多人睇住，有壓力，平時Eason個波我一定避到，佢諗住我唔靚，專揀肉酸嘅嚟打，靚嘅又唔打。」
Eason則說：「我真係要耍冧，因為頸位好弱，我又唔係殺人，我只係殺波，總之打到個波就算。」但Eason仍輸得心服口服，他說：「因為我開波唔得，又冇打好耐，所以（打波）成日打飛機。」賽後當學友得知Eason大學時乃校隊，即笑說：「咁佢學校成績都唔係好好。」
濠縈囡囡起舞
此外，「麥當勞世界兒童日音樂會」前晚在灣仔會展舉行，表演嘉賓之一的Eason在壓軸表演時叫台下觀眾站起來跳舞，他突然指着台下的女友徐濠縈及女兒說：「我個女喺度跳舞呀！」此時現場的電視螢光幕亦影着徐濠縈抱着女兒一同跳舞，表現雀躍。不過當記者欲上前拍照時，徐濠縈即用手按着女兒的頭，不想女兒曝光。此時，約六至七名保安突然衝上前阻擋記者鏡頭，更一度推撞記者。
採訪：王崇穎
攝影：林德雄
