元秋同盧海鵬孭飛嘅亞視處境劇《喜有此理》，用即日新聞做題材，諷刺時弊。鵬哥扮演跌打師傅，亦係一家之主，樓南光係鵬哥個仔，而秋姐就係樓南光個老婆。秋姐喺劇入面好大女人，樓南光對佢言聽計從。
《喜》劇監製蕭鍵鏗為咗增加新鮮感，會不斷加入新成員，馮仁昭八到佢會迫秋姐搞「婚外情」，劇情講述秋姐撞番舊愛，同佢舊情復熾。不過蕭鍵鏗重頭痛緊搵邊個男演員襯秋姐，佢私下問過秋姐，點知秋姐衝口而出話：「我想搵周生（周星馳），田雞（田啟文）都得！」
同四哥斟檔期
不過蕭鍵鏗心目中就覺得高雄、白彪、張同祖同謝賢（四哥）比較襯秋姐，始終佢哋四個嘅年紀同秋姐會配合啲，不過就要睇佢哋嘅檔期夾唔夾到嘞。