今年四月，郭晉安在拍攝《阿旺新傳》期間，他高齡八十八歲的母親病逝，但當時他為了演繹阿旺，還要在鏡頭前嘻嘻哈哈裝開心，那種強顏歡笑的滋味，實在難以言喻。
喪母之痛漸平復
安仔說：「其實都好快調節到，始終係成年人，對於生離死別，好多人都心中有數，媽媽都成八十幾歲，係好自然咁離去，但成個過程中，好多謝監製體諒我，畀時間我去緩衝，唔好畀啲通告排得咁密。劇中嘅演員都suffer（受苦）埋，因為遷就我嘅時間，令佢哋辛苦啲，但大家係互相幫助。」
飽歷喪母之痛後，安仔坦言在人生觀上另有啟示，他說：「係循環嘅生生不息，體驗到一樣嘢，一代一代延續、一代一代離去，最近我姪女生咗BB，佢生咗個仔，一個生命來臨，但另一個生命結束。」
談起母子之間的關係，安仔說：「我同媽咪思想爭好遠，佢好囉囌，佢經歷過第二次世界大戰，同我好唔同，但我哋又好親密。」他又說母親在臨終前並沒有對他這個孻仔留下訓示：「因為佢好多嘢唔認得咯，佢早十年已經爆過血管，醫生話佢有啲記憶已經冇咗，係老人病。」
安仔續說：「屋企有九兄弟姊妹，叻唔叻對佢嚟講冇乜意義，佢唔會擔心我哋嘅工作，只會擔心仔女健康，每年過時過節相聚，佢只會問我哋健康點，佢好內斂，啲嘢擺喺心度。」