臨近年尾，郭晉安憑劇集《阿旺新傳》中「丁常旺」一角而人氣再度爆燈，昨晚在無綫台慶頒獎禮中再奪「最佳男主角」。原來安仔除計劃與拍拖七年的女友歐倩怡共度餘生外，據知他早前已與無綫續約五年，借「阿旺」東風趁早落地生根。
事業篇：TVB面孔好親切
郭晉安前年憑無綫劇集《戇夫成龍》中「丁常旺」一角彈出，該劇最高收視曾達四十六點，近三百萬觀眾收看，即差不多一半香港人捧場，當時該劇的平均三十七點收視（約二百四十萬觀眾）創下無綫近十二年來新高，安仔更憑「阿旺」勇奪前年的台慶男主角大獎，這股勢如破竹的阿旺餘威，沒想到時至今日依然勇不可當。
離港拍劇不開心
卸去古裝的「丁常旺」回到現代，播映中的《阿旺新傳》上周平均收視高達三十四點，即約二百二十萬觀眾收看，再配合安仔近日趁台慶博盡催谷，加上湯盈盈的「李笑好」醜女助威，除令安仔人氣再次爆燈外，相信該劇收視必繼續攀升。
話說回來，原來安仔早於兩個多月前已跟無綫秘密續約五年，早前他在將軍澳接受訪問時，雖承認續了約，但對於續約年期和加薪幅度等問題卻一味撐艇仔、遊花園，他哈哈大笑說：「最近係續咗約，一路都拉鋸咗幾個月啦。」問安仔續約年期有否五年？他當時沒正面回覆，只說：「年期長過兩年，但我又唔覺得算好長，加人工OK呀，好好，都講感情嘅。」
四十一歲的安仔再於TVB投資五年時間，滿約時已四十六歲，看來他已打算在無綫落地生根。至於會否寄望《阿》劇再創收視神話？他則微笑說：「望佢可以啦，有就當然高興，我亦都好有信心《阿旺》會係一個收視唔錯嘅劇。」
安仔續說：「講出嚟啲人可能覺得我好儍，以前我出去拍劇，一個劇有一百人，下一次再遇到一齊拍劇嘅演員同導演都好少，惟獨係喺TVB，見到啲面孔覺得好親切，會令人好放心，可以畀心機工作。嗰時喺台灣、內地拍戲，唔開心㗎，係冇根嘅感覺。」
拒絕埋堆一樣掂
安仔打破了無綫男藝員的宿命，沒有是非，也沒有緋聞，負面新聞總與他扯不上關係，問他有沒有想過原因？他卻淡然地說：「我鬥氣啫！以前有人話，你咁嘅性格唔掂啦！咁嘅樣唔得啦！學吓去應酬，埋吓堆！呢啲係聽到我識背，發夢都識講得番出嚟，但我同自己講：唔信！我信嘅係一分耕耘，一分收穫，你今日要耕耘，唔係聽日瞓醒冇得食，我儲豬仔錢罌，有一日扑爛就知儲咗幾多錢，見證到一樣嘢，唔係要擦鞋、唔係要應酬至得。」
長江後浪推前浪，近年無綫落力催谷新人，安仔卻不擔心受到新一代小生威脅：「我哋有好多經驗，新人冇；演技揮灑自如，新人冇。重要睇觀眾想睇啲乜，鍾意睇新人、睇靚仔嘅一定有，睇演技嘅亦有，唔同層次年紀有唔同需要，其實睇到有新人上緊嚟，成功咗，都戥佢開心㗎。」至於對哪位新人較有印象？安仔就說：「馬國明仍須努力，要辛苦啲；Bosco（黃宗澤）有潛質，都已經算係獨當一面，佢幾精靈，呢樣好緊要，佢轉數快，間中識搞吓氣氛，令周圍嘅人幾relax。」
撰文：朱倬誼
攝影：何國豪
服裝：Replay
