盧巧音是VivienneWestwood的超級fans，她表示在NANA未出現之前，她早已作類似打扮，因為NANA是源自punk文化。盧巧音日前示範如何扮NANA，她表示首要條件一定要夠瘦、夠爛和夠cool。
盧巧音十二、三年前開始追捧VivienneWestwood，曾在香港修讀了兩年時裝設計的她，於十九歲那年特別到倫敦「朝聖」，並在街頭鑽研punk文化，漫畫《NANA世上的另一個我》中的女主角經常穿着VivienneWestwood，盧巧音當然不會錯過。而盧巧音與主演電影《NANA》的女主角中島美嘉同屬SONY唱片公司，所以她曾在電影首映禮上，以punklook與中島美嘉合照。
赴英國取經
盧巧音說：「其實我好早期已經係NANA打扮，因為我鍾意英國嘅punk，NANA其實就係將punk呢個文化帶咗去日本再發揚光大，NANA同punk唯一唔同嘅，就係NANA加咗襪帶，呢個係原本punk入面冇嘅。我覺得中島美嘉飾演『娜娜』都唔錯，因為佢夠瘦，扮『娜娜』最先決條件就係要瘦，唔係歧視，如果肥，根本着唔到貼身牛仔褲、出面再包對長boot。」
盧巧音當年去了英國兩個月，經常流連公園和地鐵，參考和吸收當地人的punk打扮，她說：「punk嘅精粹係『爛』，即係打爛一啲嘢，好多時可以自己郁手，DIY剪爛或扯爛啲衫，英國好多人都冇錢㗎，不過佢哋着得好鬼型。雖然我好鍾意英國嘅時裝，但係我唔鍾意英國人，佢哋好歧視，我同黑人friend啲。我試過去一間酒店借廁所，佢哋唔肯借畀我，因為我係黃皮膚，當然，亦因為我當時冇錢啦，如果我喺嗰度消費嘅，你估佢肯唔肯借廁所畀我？」
創自家品牌
盧巧音一直希望學以致用，並計劃由替藝人做形象開始，盧巧音說：「我入行前做過兩年櫥窗布置，都叫做有經驗㗎，𠵱家我會幫同公司嘅劉心悠、陳思慧做形象攞吓經驗，遲啲當然想有自己嘅品牌啦，但一步一步嚟，我亦會繼續唱歌、拍戲。」
採訪：張止寒
攝影：何國豪
服裝：VivienneWestwood
髮型：MattChiu（HeadQuarters）
場地提供：ZEFFIRINO、HeadQuarters
