移民三藩市灣區之賓架陳與移民溫哥華之賓架梁同時回港探親，佢哋嘅舊同事、下屬請佢兩位飲茶，叫埋左丁山去。賓架陳與賓架梁都年逾七十五，係老前輩，未離開香港前，銀行界無人不識，梗係要尊重啦，於是走上皇室堡十四樓之「帝廷」。第一次去皇室堡飲茶，估唔到間酒樓咁大間。臨窗而坐，望住維多利亞公園，景觀開揚，冇坐喺一啲位於地庫酒樓所遇嘅壓迫感。
唔知係唔係三藩市灣區與溫哥華之空氣好呢，兩位前輩都精神到極，聲若洪鐘，如果左丁山到咗七十五歲都有佢兩位咁健康，就認真有福。賓架陳講起亞洲禽流感，羅氏藥廠話暫時唔供應特敏福畀美國，左丁山對佢講：「唔使怕，你住在SanMateo，發明特敏福，授權畀羅氏生產呢隻藥嘅公司叫做Gilead，總部就在SanMateoCounty之內嘅FosterCity，就算第二度冇特敏福，你嗰區都怕會有貨賣！」
Gilead隻股票最近升勢凌厲，係禽流感之最大受益者，可惜我哋散戶永遠後知後覺，𠵱家又唔敢追貨咯。賓架陳以前係舊廣東銀行（現美國銀行（亞洲））總經理，一手將廣東銀行大事革新，功不可沒。佢又外號Bills王，Bills（稱為押滙部，專負責信用證、D/P、D/A、信託收條之部門），現在銀行嘅押滙生意冇晒以前嘅風光，後生一輩唔知識唔識呢。
賓架梁就係珠寶王，但凡香港任何一間有名堂嘅珠寶公司，都同賓架梁打過交道，佢對珠寶市場及信貸風險瞭如指掌，威名遠播，在銀行界可說後無來者，唔信嘅話，大可問吓彤叔、冼博士、鎮科。佢對啲珠寶業務點解咁熟行呢？左丁山未跟過佢，知其一不知其二。知其一者，就係賓架梁日日夜夜與珠寶商應酬往來，貼到實，知道晒行情，今日之年輕賓架如要做到呢一點，怕要同老婆離婚都似。