「拍咁多動作片以嚟，我覺得同李連杰喺《黃飛鴻2》嘅打場面，可以話係自己拍得最過癮嘅，我同佢合作過兩次，佢嘅功夫底子好好，喺銀幕上佢亦好識得運用身手，同佢拍戲真係要好專注，因為佢係一個唔易應付嘅對手。如果用音樂比喻李連杰，我就覺得佢係古典音樂，優雅而耐聽。」
成龍像一齣粵劇
「成龍走嘅主要係喜劇動作路線，而我一直走實戰搏擊嘅動作戲路，我同佢戲路雖然唔同，不過成龍嘅電影一樣會有好多高難度嘅動作鏡頭，所以佢冇番咁上下身手，係好難應付。我同佢喺《千機變2》都打過一場，感覺幾好。我覺得成龍都係一位有個人風格嘅動作演員，佢對香港動作片嘅貢獻亦唔可以抹煞，如果要以音樂來比喻佢，我會選粵劇，愈聽會愈有味道。」
柏朗伊雲欠風格
「柏朗伊雲（TonyJaa）嘅成功，某程度係觀眾太耐冇睇過真材實料嘅動作片，所以睇到一部標榜以真功夫、冇用替身嘅《拳霸》，當然好有新鮮感。我睇佢打嘅功夫其實唔係純泰拳，打得幾雜，不過我唔會抹煞佢係有身手同有真材實料，但當運用喺電影上，佢個角色設計總係擺佢喺下靶位，最出位就係俾人打，又或跳吓火圈，打吓觔斗，感覺就似香港拍嘅《五福星》片咁。如果由我設計動作畀佢打，將佢優點盡量發揮，佢肯定會更有個人風格。」
洪金寶靈活高招
「洪金寶係一位幾全面嘅動作演員，我欣賞佢重多過李連杰，以佢嘅身形，身手重可以咁靈活，真係唔簡單，而且拍時裝打或古裝打，佢一樣得。佢設計嘅動作比較即興同隨意，我同佢合作拍《殺破狼》時，因為部戲由我做武指，我設計嘅動作佢會好尊重，呢位前輩喺現場亦會提供一啲意念畀我，佢都係一位好出色嘅動作導演，同佢合作，我都學到嘢。」
李小龍獨一無二
「李小龍係我偶像，佢唔止係一位有演技嘅動作巨星，銀幕下佢嘅功夫亦都係好勁，而且好有爆炸力。環顧現今咁多動作演員當中，冇一個可以擁有李小龍嘅功架同台型，佢出拳同收拳，每一個動作同表情都係充滿味道，其他演員學都學唔到佢嘅神韻，呢個就係佢歷久不衰嘅原因之一，而且佢嘅人生哲學同武術，對我有好深遠影響。」
甄子丹譜爵士樂
「我覺得自己喺咁多香港動作演員入面，風格較接近李小龍，大家都係受過西方文化薰陶，又係中西功夫都學齊，但當然我有好多方面都唔可以同呢位超級偶像相比。但我打得係人都知，喺我嘅動作世界入面，我係追求完美同真實，最唔主張用特技去代替真功夫拍戲，因為咁樣會失真，如果要用音樂形容自己，我覺得自己係爵士樂。」
