天安（028）重喺年半低位載浮載沉之際，同類股已經炒到㷫烚烚，天安有得諗。天安最新NAV5.17元，現價（1.78元）折讓65%，已經有炒折讓條件，而集團喺祖國土儲達3900萬平方呎，假如未來每方呎增值1張紅衫魚價錢，天安NAV幾乎可以翻一番。又祖國房地產主打中國海外（688）及合生創展（754）晨咁早創出1年高位，落後新中（917）呢勻亦見發力，向1年高位3.32元亦步亦趨。呢幾隻股仔，狂升各有前因，但要咁睇，呢期市場翻煲人仔升值課題，呢個大圍炒作理由，天安一樣照單全收。
天安上日成交股數17球，係04年2月19號以嚟最大成交一日，開始有味道。又睇番2月呢一日，中國網絡（383）沽出手頭天安股份，呢批股份，中網每股獲利價3蚊，佔天安8.3%（7280萬股），唔係細數目，斷估尋常百姓參與率唔太多，天安彈番上呢個位之日，代表現價升幅68%。
第一上海0.5元博番轉
第一上海（227）公布出售兒童產品Geoby49.5%權益，11號復牌以嚟一路插水，啱位可以兜轉，又講兩點：花旗納指對上星期五見2227，又創01年5月以嚟4年幾高位，彼邦龍頭Google亦突破400蚊美金。第一上海家陣透過聯營中國資本（170）揸住花旗上市嘅科技股「空中網」，掹車邊受惠美國科技大熱概念。第二，第一上海話分拆兒童用品業務，講咗N年，重未成事，呢勻話出售（有待股東特別大會表決），未有話分紅，市場似乎唔alright，引發股價急插，但到現水位，現價（0.56元）相對NAV1.09元折讓49%，有得炒折讓。隻股再跌，挨近0.5元博番轉，跌穿04年低位0.475元畀番佢，風險有限。
錢雋