郭晉安與歐倩怡拍拖至今，已踏入第七個年頭，有說七年之癢是夫婦和情侶的大關口，問安仔有沒有身痕？他邊笑邊搖頭說：「唔痕，相處係要學習，唔係女朋友追到手就完結，就算去到結婚，喺另一個階段都要學習，生仔女、照顧佢哋係十幾年嘅planning，唔係帶吓佢哋返學，帶佢哋去迪士尼就滿足。我係一個好實際嘅人，學習係好漫長，大家要學精神上點溝通。」
女友講嘢隨口噏
安仔的計劃如此長遠，揚言一生都要學習與女朋友相處，直至這一刻，他心裏是不是打算與歐倩怡共度下半生？他笑說：「慣咗呢個模式都幾開心，冇必要就唔好節外生枝啦，大家學吓相處，有缺憾就互補不足，學識同對方說話嘅輕重。有時啲嘢隨心講冇意思，誤解咗就好嚴重，我都係最近先知咋，Cindy（歐倩怡）話女人講嘅嘢聽五個巴仙好啦，隨口噏㗎咋，真係嘅話就會重複又重複咁講。𠵱家學識啦，我哋基礎幾好，唔會好似人哋所講嘅，年紀距離大係就有問題，學習同步就得。」
與負面新聞絕緣
未婚的安仔要與緋聞斬纜亦不容易，對此他笑說：「我唔蒲、唔飲酒，重戒埋煙，有時都會去卡拉OK，但都係我同Cindy拖住手一齊去唱歌，有時會睇吓九點半。冇緋聞係因為我坦白，從來冇掩飾任何嘢，同Cindy拍拖，成熟咗就公開關係，係咁就咁，毋須刻意，要有緋聞，都要郭晉安隔籬有個女人至得㗎。」
問安仔拍拖後是否未曾與異性單獨食飯？他笑着點頭：「除咗嘉莉（經理人）囉，又除非拍戲啦，都試過同胡杏兒一齊拍嘢時，趁工作人員set燈，我哋就走去隔籬街食餐好啲，同埋好好彩囉，啲記者唔想『做』我。」