煲呔結束一連四日嘅釜山APEC之旅，除咗有幸多次親近國家主席胡錦濤，大家摸手談心之外，佢同夫人曾鮑笑薇入住嗰間農心溫泉酒店，上上下下所有職員都當佢係上賓看待，唔怪得煲呔成個行程都容光煥發，心情靚過喺香港唔知幾多。
關閉溫泉 用私家𨋢
煲呔噚日同領導人着完民族服裝大合照後，返去酒店回答咗記者幾條問題，就即刻上機飛返香港。酒店員工見煲呔checkout，拿拿臨call齊各部門阿頭喺紅地氈兩旁列隊，拍爛手掌歡送煲呔。煲呔見到呢個場面，當堂笑到見牙唔見眼，重即刻向員工作九十度鞠躬，高呼thankyouverymuch，真係high到暈。
煲呔貴為香港特首，去到韓國待遇自然高人一等，為咗保護煲呔，間酒店特別加裝金屬探測器，搞到其他住客都有啲唔方便，酒店個大型溫泉又基於保安理由，關閉唔畀住客使用，煲呔車隊出入時就更巴閉，八方有日同幾個行家準備返入酒店，煲呔架車重有十分鐘先到，結果俾人趕到去酒店門口，重有個自稱「Iamthesecurityman」嘅韓國人擋住去路，要成棚人企出對面個停車位等候，硬係要煲呔返到嚟先畀住客進入，結果成班行家食咗兩三個字西北風先返得入酒店。
呢間農心酒店得兩部𨋢，有一部成日hold住畀煲呔專用，煲呔住喺九樓，但係八樓都有兩個G4喺度守住，搞到住客出入都唔方便，所以每次領導人出訪，都咪話唔擾民。
爆料熱線：29290000、27860099
報料傳真：26239278
報料電郵：[email protected]