中共中央忽然高調紀念已故總書記胡耀邦九十歲誕辰，重喺人民大會堂舉行座談會，由政治局常委曾慶紅發表講話，大讚胡耀邦嘅為人同貢獻，係共產黨人嘅良好榜樣喎。
八方都好敬佩胡耀邦，特別係佢勇於為共產黨撥亂反正（否則中共可能收咗檔），做好人幫啲老同志平反，可惜呢個世界好心冇好報，最後佢自己被班老嘢拉下馬，含恨離世。
人都死咗十幾年，中共好似想為佢做小小平反，不過，叫人學佢顧全大局就咪搞啦，因為佢當年就係為大局壯烈犧牲咗，所以班民建聯成日話叫民主派學佢哋大局為重，邊個咁笨會信共產黨講大道理？
支聯會亦反應快，華叔一聽到中共要紀念胡耀邦，就一早定咗聽日下晝喺旺角西洋菜南街行人專用區舉行圖片展同座談會，華叔同八方講，胡耀邦係共產黨嘅異化，佢為人開朗同開明，要紀念佢最好嘅方式莫過於平反六四。唔知胡錦濤聽唔聽到。
傳真︰2623-9278
電郵︰[email protected]