老董下台死因有好多，其中一個，肯定係因為佢唔識AO文化，嗱，煲呔同肥龍就識做好多。好似星期二，政務主任協會喺君悅同六個夠鐘拜拜嘅AO搞歡送會，一日走幾場嘅許老爺約咗柏林愛樂樂團總指揮食飯，但就算遲大到，都去同大家social一下，以示對AO重視。
六個退休嘅AO包括梁展文（CM）、李麗娟（Shelley）、梁寶榮（Bowen）、地政總署署長劉勵超嘅太太趙崇幗、喺民政做嘅劉國材同埋許鄔芸芸。CM同Shelley都係新制，即係六十歲先至退，眾人媽打就因病提早咗幾年；而Bowen佢哋四個就係舊制，即係五十五就可以拜拜，因為搵唔到人，所以Bowen要喺北京坐多一年，現在五十六歲先榮休。
八方聽聞，嗰晚出席歡送會嘅AO相當踴躍，開咗十幾圍（全體AO約有五百人），每位約八百大元都有百幾人參加，算係有情有義。協會會長李淑儀（Sandra）當然祝佢哋退休愉快，不過最有意思嘅係梁寶榮臨別贈言講到政務主任前景時，好幽默咁話政務主任仍然好重要，因為北京官員非常尊重AO。呢個肯定係佢老哥七年駐京嘅感受，班AO個個叻仔叻女，一定聽得明。
當晚有份出席晚宴嘅官員形容，CM成晚冇乜出聲，好似有小小唔開心，第二日始真相大白，原來審計署長發炮轟佢喺嘉亨灣有明益恒基之嫌，唔怪佢面黑黑。AO同大陸高幹一樣，最怕衰收尾，咬唔到長糧就認真大件事。
最唔識撈首推老董
話肥龍識做，煲呔都不相伯仲，雖然當晚冇去飲，但據前民航處處長林光宇（Albert）話，煲呔同陳四萬一樣，年年都親手寫聖誕咭畀高級AO，雖然寫嚟寫去都係MerryChristmas等行嘢，但都令AO冧到不得了，因為覺得煲呔心目中都有小小嘅自己嘛。
Albert重話，舊年佢退休時，煲呔都特登叫秘書打電話畀自己，約食飯farewell，結果兩個大男人就去咗HongKongClub食lunch，呢啲咪叫做識撈囉。
唔識撈嘅例子首推老董，Albert話在任幾年以嚟，唔單止無收過老董寫嘅聖誕咭，甚至一餐簡簡單單嘅晏仔，都無試過同老董食。咁樣做嘢法，公務員又點肯同佢賣命？
傳真︰2623-9278
電郵︰[email protected]