恒指再升95點,不過期指則只升52點,由高水變回低水38點。恒指距離萬五點尚差117點,要破關恐怕需要一番努力,或需要較多嘅利好消息,暫時似乎搵唔到。一啲升得急嘅C輪,追唔過,等相關正股回順時低價上車,比較穩陣。
新地C輪:新地(016)收74.95元,進帳1.20元,帶動3隻C輪9131、4889與9286打入威水榜3甲,升幅依次係55%、82%與90%,總成交金額26萬元,買貨者實係玩緊死亡遊戲。
9131與9286明年1至2月夠鐘,分別收3.1仙與5.7仙,溢價13.8%與14%。博新地升10.5元以上,唔係唔得,但機會好微。4889下周五最後買賣,行使價76元,正股低過行使價1.05元,重有少少機會唔使作廢,但冇乜成交,無謂搞。
新地C輪正路之選係9059,明年4月到期,輪價32仙,溢價4.3%,槓桿率23.4倍(有效11倍),引伸波幅21.4%。但正股升勢能否持續存疑,都係等平啲先至考慮。
恒指P輪:恒指P輪4753收1.7仙,散32%,有65球易手,登上死火榜。隻輪下周三最後交易,得3日玩,行使價14800,未來3日,恒指跌唔夠83點以上,隻輪冇得剩,當然輸晒只係1.7仙咁話。
恒指昨日上升,恒指P輪自然散落去。博大市短期回頭,恒指P輪可以揀9422,明年3月初夠鐘,輪價57仙,溢價3.5%,槓桿率13.2倍(有效8.5倍),引伸波幅21.7%。
章盛