隔籬埠特首阿鏵哥噚日唔知着乜褲，如果係淺色褲就要留意吓條褲腳有冇污糟，事關佢對皮鞋有太多鞋油。
阿鏵哥早幾日發表施政報告，雖然冇乜話強政勵治，冇乜福為民開，不過就承諾提供十五年免費教育，重有時間表㖭。另外又繼續減稅，又加大對長者及弱勢社群嘅福利。鏵哥咁務實，小市民當然受落，估唔到大財主佬一樣拍晒手。賭王何鴻燊噚日就公開話何特首份○六年施政報告係一份好方針，重話「我在澳門幾十年，未見過有一個施政方針報告係咁好嘅」……十五年免費教育，連香港都冇！記得老董講施政，搞到賭王講足七年大話；今番佢評論何特首政策應該唔係大話喇啩。
傳真︰2623-9278
電郵︰[email protected]