由詹瑞文一人扮演多個角色的OneManShow《男人之虎》曾三度公演，吸引四萬六千觀眾欣賞，即將第四度公演，為了令演出內容符合最新的話題，詹瑞文今次的演出將加入一些新角色，但他仍會保留令觀眾留下深刻印象的人物，他坦言《男》劇除令觀眾反思外，最高興是《男》劇還成為香港人的一個討論話題。
由詹瑞文主演的《男人之虎》猛料版將於本月底公演，此劇於早前上演時備受好評，而且吸引了不少圈中人捧場。而最令人留下深刻印象的是阿詹一人扮演多個角色，其中包括章小蕙、黃秋生、蔡楓華以及周星馳等。
為觀眾飛走何偉途
詹瑞文扮秋生時在台上大講粗口，令觀眾捧腹大笑，故他今次演出也會保留此角，他說：「黃秋生呢個角色喺演出時講好多粗口，呢個角色係代表咗一啲草根人物，佢爆粗呢個行為都好『香港人』。而蔡楓華呢個推銷員角色就好睇到香港人做嘢好拼搏嘅一面，佢雖然努力做嘢，但始終發唔到圍，好多觀眾會好有共鳴。」
不過為了令觀眾欣賞時不會覺得題材過時，阿詹每次表演時都會加入一些新角色及刪去一些過時角色，例如於即將公演的版本刪去何偉途生牛皮癬一幕，他說：「做一個咁長時間嘅騷，一定要令台下嘅觀眾有共鳴先至係最重要，如果我重講一啲out晒嘅topic，唔不停咁改進或者加入一啲talkingpoint，咁又點會引起人哋嘅興趣睇落去呢？」
據知過往入場觀看《男人之虎》的觀眾多達四萬六千位，詹瑞文當然為此自豪，他認為《男人之虎》不止是一個舞台上的演出。
超越笑話引發討論
詹瑞文說：「《男人之虎》唔係要去諷刺時弊，入面嘅角色其實好反映到好多唔同層面嘅香港人，有好多唔同階層嘅縮影。事實上香港有好多娛樂畀人去選擇，啲人入場睇我唔係笑完就算，佢哋睇完之後係會去諗吓嘢，反而呢個演出係變咗一件事去畀香港人去討論，呢樣係我覺得最開心嘅。」
採訪：李珮洳 攝影：何國豪
