全程傍住老細煲呔曾出席APEC會議嘅鬍鬚曾，得到煲呔歡心之餘，最近得到舊老細肥彭嘅讚賞。八方噚日喺釜山問佢有乜反應，鬍鬚曾只係好淡然咁講句「多謝佢囉」。咁又係，肥彭只不過係舊老細，加上鬍鬚曾兩年後隨時可問鼎政務司司長個位。有行家問佢係咪會轉做特首辦主任再上位，佢就大耍太極，話自己𠵱家將101%嘅心機放喺搞世貿會議上。
講開舊老細，老董同肥彭真係同人唔同命，事緣立法會財務委員會噚日傾每年使二百二十萬為離任特首設辦公室嘅安排。大嚿陳偉業就好反對，孖叉腰纏萬貫嘅老董，離任後參加埋啲活動不過係民建聯十三周年晚會、同中華總商會酒會，老董已經禍港七年，冇埋由再搵納稅人笨，津貼老董畀面民建聯！長毛插多把口話，老董在任期間身家已經三級跳（因為東方海外股價升），落咗台重要搵納稅人着數，如果再益老董，簡直係畀佢「又食又拎！」
譚耀宗反擊話，啲同事唔好講到民建聯咁差，民建聯都係全港最大嘅政黨！最後，立法會都係大比數通過。
傳真︰2623-9278
電郵︰[email protected]