捷美能源（702）噚日大跌33.33%至0.04元，跌至接近邢曉晶所提出的全面收購價0.0362元水平。黑客話，由於全購建議已經截止，有心人已經毋須再托價，暫時可以任由股價回落。
全購截止捷美FreeFall
不過，新大股東斷估唔會買殼之後任由股價冇表現，點都會搵啲資產注入去，吸引散戶追捧。邢曉晶在中國東北地區物業投資及能源項目顧問業務方面有豐富經驗，相信捷美日後好大機會向呢兩方面發展，集資行動亦會陸續來。
捷美雖有注資概念，但由提出全購至今，成交金額最高的一日只得349萬元，平時只得數十萬元，甚至無成交，反映此股炒味不足，難吸引散戶追捧。雖則控股權已易手至新主手上，但聽聞間公司有唔少短債未掂，相信新主一時間難以醫好間公司。
主要從事玩具業務的彩星（635）又再涉足地產市場，斥逾2億元買入20個麥當勞道半山樓盤單位，令市場完全難以理解，究竟係公司對樓市前景好樂觀，定係本業盈利前景唔好呢？公司斥巨資購物業，難免令投資者擔心會影響派息？股價噚日應聲大挫10.52%至1.02元。
睇嚟彩星管理層都要出嚟解吓畫，此股近期從1.30元展開調整，累跌幅度已達21.5%。i師傅亦話噚日見到唔少止蝕盤出籠，當中有芬佬減持，但股價在1元水平有頗大承接力，好似有人在維持秩序，但就唔知可以維持幾耐？
半新股佳邦（471）噚日大幅反彈17.24%至0.68元，但成交只得526萬元。此股以1.02元招股，上市時港股氣氛欠佳，股價最低見過0.56元，累跌高達45%，噚日雖然反彈幅唔細，但現價仍跌得過份。
阿虎