趙飛雲昨日上到股票行，見到有個好耐無蒲頭嘅股友，問佢呢輪有乜嘢搞作？佢話呢輪股市難搵食，已輸到七七八八，本錢唔多走咗去賭馬，可能係近年賽馬難玩投注額急跌，馬會為救亡加強監控，近排賽果正常番好多，禮拜三佢中咗條4串11連贏，搵到些少本錢再嚟股市炒過。趙飛雲就笑佢唔好打劫紅毛鬼，進貢法蘭西。
裂口升跌買賣難
港股近年其實亦愈來愈難玩，大市走勢有個特點，就是經常在面對大阻力位或重要支持位，出現裂口性上升或下跌，相對於市值大港股好多嘅美股，就好少出現呢類走勢，或多或少反映港股較易受人為因素影響，增加散戶買貨或走貨的難度。
好似噚日咁，港股承接外圍升勢，恒指以大裂口升破50及100日線14800關，一開就是全日高位14924，之後大部份時間在14880-14910窄幅徘徊。散戶想買平貨唔使諗，高追則擔心隨時要坐艇，搞到唔少想買貨嘅散戶好頭痛，處於進退維艱嘅局面。
通常大戶計到數，無論指數或股票在裂口抽高後，如果少人追貨，稍後經常會再抽高啲，等早前唔買嘅人更要畀貴啲。
另方面，如果太多散戶追入搶貨阻住晒，大戶又隨時會掟番轉頭等佢哋坐吓艇，悶到咁上下嚟一次大震倉，等大部份人慌忙跳車後，就即刻急開車。
總之喺股市搵食就愈嚟愈艱難，好難畀你睇定先做嘢，想搭順風車就更加唔容易，想搵個靚位入市通常都要博，如果周初跌市時唔買貨，趙飛雲現時都好頭痕。
本周六唔講股票，大市形勢及推介，下周一再講。
趙飛雲