陳奕迅：「想佢扮煲呔曾」
好希望阿詹唔好刪減之前任何角色，因為我覺得每一個角色都好有佢嘅特色，今次再睇佢嘅演出，我就最想睇到佢扮曾蔭權，因為呢一刻香港人都好關心民生，到時叫阿詹記得打個煲呔出嚟，重要扮埋曾特首俾人鬧嘅時候都係笑住笑住嗰個樣。
林海峰：「嬲阿詹冇扮我」
我最唔鍾意阿詹冇扮我囉，可能我唔夠立體，冇嘢畀佢扮到。如果加入一個新角色，就千祈唔好扮KingSir，反而我想睇KingSir扮佢。另外我想睇佢講「無題」，睇吓佢點自己發揮。我重想睇佢做足一世破盡紀錄，我哋就睇足一世。
at17：「學古巨基唱歌」
（林二汶）我覺得佢扮周星馳嘅神髓扮得好似，今次我想睇吓佢扮Twins，一人分飾兩角有一定難度，二來Twins係年輕人嘅標記，所以想睇佢演吓。
（盧凱彤）我好想佢扮古巨基唱歌個樣，因為基仔唱歌嘅神態幾特別。
谷祖琳：「扮阿好或阿旺」
咁多角色之中我就最鍾意黃秋生，因為我去睇嗰晚秋生坐喺我隔兩個位，詹Sir一講嘅時候就聽到秋生大笑，所以個感覺特別強。我想詹Sir扮李笑好或者阿旺，我睇電視劇已經覺得好笑。一個OneManShow可以做咁多場，我都想睇多次。
