剛剛被選入大摩香港小型指數的彩星集團（635），噚日失驚無神被質低10.53％，收1.02元，成交唔細，有成1.08億元。
小初問經紀黃發生乜嘢事？佢話原因好簡單，有芬佬唔滿意公司以2.18億元買入20個半山單位。
芬佬對工業股投資與本行無關的業務，通常都好有意見。雖然彩星現金多，動用2億銀唔應該有問題，但以往工業股轉行搞第二樣生意損手嘅例子唔少，所以今次有芬佬沽貨，實在唔難理解，就連彩星被納入大摩小型股指數呢個好消息都頂唔住。
另外，自從完成供股計劃後，由1元起步炒作至今的冠中地產（193），唔經唔覺已經去到3元水平。經紀陳話，睇嚟江湖傳聞已久的注入澳門酒店物業交易，應該好快落實。
小初一直都唔明，家陣濠賭股炒風不再，但冠中進軍澳門都可以成為炒作藉口？經紀陳話，聽講係因為隻股之前size太細，所以要供股集資，再炒高股價令市值增大，先至可以進行注資交易。
慕容小初