日本東北嘅山形縣，近日準備控告澳洲一家水果公司，話佢哋嘅兩名主管喺九九年到當地參觀櫻桃園時，偷走名貴嘅三株櫻桃樹苗，攞返澳洲培植，重長出櫻桃㖭，嚴重侵犯當地果農權益。聽講，山形縣官員近日睇咗一本雜誌介紹澳洲栽種日本櫻桃成功後，才揭發事件。唔講唔知，山形縣原來係電視劇「阿信」嘅鄉下，又有水果王國嘅稱號，佢哋盛產嘅櫻桃世界聞名。