薛凱琪（Fiona）噚日出席「十全十美忽然之星選舉頒獎禮」，佢得到最青春活力大獎，着咗條妹妹裙嘅Fiona，重俾司儀讚佢嘅打扮有古典美㖭。
相士蘇民峰上年年尾曾經批過Fiona今年會撞車，估唔到真係應驗咗，Fiona日前坐保母車途經尖沙嘴時遇上輕微車禍，好彩人冇事，架車亦只係少少損毀。
司機粗口對罵
早幾日大約下晝四點半，Fiona由助手陪同下乘坐出租保母車途經尖沙嘴柯士甸道，其間同一輛客貨車發生輕微碰撞，保母車塊倒後鏡被撞爛，保母車司機即時爬頭，用車身阻攔客貨車前進。之後保母車司機即刻跳落車同對方司機理論，雙方重爆晒粗。兩車司機企喺路邊嘈咗十分鐘，終於和解了事，不過佢哋將部車停喺馬路，就搞到柯士甸道一度大塞車。
馮仁昭日前同Fiona傾開呢單嘢，佢話：「冇乜嘢，小碰撞啫，當時我係喺車上，但冇乜點驚，蘇民峰之前咪話我今年會撞車嘅，我當呢次係㗎啦，化咗冇事！」Fiona又話當初被蘇民峰批撞車時都幾驚，搞到唔敢考車牌喎。
