辯論民主選舉，甚麼時候實行普選，應該之至，香港唔係一言堂，亦非上街示威就大晒。可惜呢，反對普選之人，講來講去三幅被，就係時機未成熟，香港未有條件。呢個理由，聽得多都火滾；利比利亞有直選，阿富汗/伊拉克人民冒着槍林彈雨去投票，不丹國王話要君主立憲，點解唔見人哋話時機未成熟呀？講教育，講人均生產總值，講國際化程度，香港人有邊樣嘢不如利比利亞，我哋只有一樣不及人，就係五千年飽受皇帝摧殘，奴性太重，中國人身體內藏恐懼當家作主之DNA！
十一月十六日，全港報紙都有一份廣告「全力支持政改方案」，來自一位「堂堂正正，有名有姓有良知的老伯顧明均，呢位顧先生於一九四四年出世，得六十一歲啫，個樣就老，年紀就唔係老。呢位顧先生一日之內，用過百萬銀廣告費嚟支持政改方案，認真唔話得，佢嘅身家可能厚過黎智英，唔使肥佬黎津貼一半廣告費啩？佢以前一捐就捐成億銀畀浸會大學，用百零萬賣廣告，濕濕碎啦，最近顧先生又搞緊一單上市公司私有化，啲分析員講佢叻到以高價上市，低價收回，直情神乎其技，一來一回，就淨收億億聲，我哋發夢都冇咁多錢。
顧老伯錢就多嘞，可惜篇廣告大而無當，文字冇力，邏輯不通，引黃仁龍親自介入彭楚盈死因研究為「青天重現之清新氣息」，簡直莫名其妙。如果用番廣告費半成嚟搵位高手做Copywriter（或索性益吓廣告公司代辦），廣告效果可能更好。左丁山識得如何用錢達致最佳效益呀，可惜左丁山係冇錢之人呢。
希望反對普選，支持第五號政制報告書嘅有錢人家，繼續賣大版廣告，支援窮鬼傳媒，不過亦希望佢哋用啲錢搵人寫好啲文字！