香港教育學院「正名」大學嘅爭議，近嚟鬧得熱烘烘。教院嘅學生會同教學人員協會噚日力撐要將教院正名，學生會重趁學校舉行畢業禮，喺校園「搞嘢」，向畢業學生派發用黃色紙印製、黑色絲帶綁住嘅「大學」畢業證書。
學生會外務副會長宋軍碩話，黃色象徵生機蓬勃，但俾黑色絲帶綁住，諷刺當局唔將教院正名。佢哋諗住下星期約見教統局局長李國章。不過，唔好話政府唔畀面，連教院校董會主席梁國輝，對正名一事都態度軟弱。佢話正唔正名要睇政府同公眾人士支唔支持喎，重話唔排除教院最終會同其他大學合併㖭。
咁睇嚟教院要變身大學都幾難嘞。
傳真︰2623-9278
電郵︰[email protected]