以表揚香港電影業界傑出人士而設嘅「星光大道」，繼上年有七十三位業界人士打手印後，今年再加添十位影藝前輩，分別係關山、嘉玲、王天林、劉家良、紫羅蓮、林家聲、鮑方、石慧、傅奇同葛蘭。
「老闆不是明星」
噚日關山、劉家良、嘉玲同王天林喺尖沙嘴出席打手印儀式，關之琳嘅爸爸關山接受訪問時，語帶激動咁話：「星光大道就是只該讓明星留名打手印，導演、電影公司老闆不是明星，不發光根本沒有資格。之前我帶內地朋友參觀星光大道，有些不是明星的，他們都不認識，所以應該將那些頑石除去，要表揚他們應用別的方式，我是明星，大家打我也打，星光大道只有明星打手印的話，晚上不用電筒照，石也會發光。」而曾經喺星光大道打手印嘅導演同老闆包括有邵逸夫（六叔）、何冠昌、吳宇森同徐克等等。
王天林就話被邀請打手印係件開心事，不過佢覺得𠵱家先請佢就遲咗啲。對於王天林同關山嘅言論，香港電影金像獎主席文雋就話：「我要向天林叔致歉，另外，星光大道嘅設立，係為表揚對電影有貢獻嘅電影工作者嘅。」
